زما ښكلى وطن


دا چې تور سوى يې وينې
په هر لور يئ جاري وينې
دي كيسې پكې د مينې
غوڅوي دزړونو سپينې
سوي اور كې يې چمن دى
كه ريحان او كه سمن دى
دا زما ښكلى وطن دى
دا زما ښكلى وطن دى

په ژړا يې يتيمان دي
مظلومان او غريبان دي
كه يې پېغلې كه ځوانان دي
ټول زمري د كوهستان دي
توفان وړى يې چمن دى
كه شب بو كه نسترن دى
دا زما ښكلى وطن دى
دا زما ښكلى وطن دى

بلبلان يې مهاجر دي
پرېشان ټول په خاطر دي
كه حاضر كه غير حاضر دي
دوطن په حال ناظر دي
هر وګړى يئ پتمن دى
كه شتمن كه نا شتمن دى
دا زما ښكلى وطن دى
دا زما ښكلى وطن دى

په اور سوى يئ كابل دى
د نړۍ د اوربل ګل دى
زما اور بل په ګوګل دى
دا مې سوى نصيب خپل دى
هر افغان ته روح او تن دى

هم يې ځان هم يې بدن دى
دا زما ښكلى وطن دى
دا زما ښكلى وطن دى

هره تيږه يې طلا ده
دښمنانو ته بلا ده
كلمه يې لاالله ده
محمد رسوالله ده
يرغلګرو ته مدفن دى
په ايرو كې پټ خوږلن دى
دا زما ښكلى وطن دى
دا زما ښكلى وطن دى