ښکلي خو ډېر دي په دونيا کې ماته ، ته ښکلې يې
دا ستا ښکلا ځکه ليکم چې مې په زړه ښکلې يې

شاعران ستايي د غوټيو ښاپېريو ښايست
زه به دا ستا صفت کوم چې له هر څۀ ښکلې يې

خدای چې درکړي تاته ګرانې تورې ښکلې سترګې
زما په سترګو خو رښتيا هره لحظه ښکلې يې

څنګه خوره وره پرته په سره پالنګ کې ګلې
ځکه دې نه راويښومه چې ويده ښکلې يې

پام کړه هوس چې د پرديو رواجو ونه کړې
په خپل وطن کې قدرمنه په کاله ښکلې يې

روغ لېونی دې ښکلا مينه په غزل يادوي
رښتيا رښتيا د خوږې مينې په نشه ښکلې يې.