د ښاغلي ارمان " لېوني" شعرونه

 د شعرونو لومړۍ پاڼه

کـــور

 
واه دا ځواني ېې ګورئ
له بدو سترګو لرې
دا ګل ډنډغره ځواني ...
دا بشره ېې داسې ښکاري
لکه خدای وي جوړه کړي
د خپل نور په نوراني رنګ
په قلم د لوی قدرت خپل
د کوثر د جام په میؤو
***    ***
وړه خوله ېې د نرګس ګل
لکه سور په سورکو وینو
د حسین د څیرې زړه وي...
اننګو باندې ېې ګورئ
لوی تصویر د اوو واړو
جنتونو راښکل شوی
په پستو سرکوټو شونډو
ېې راټولې ګیرچاپیره
د وطن ترانې ناستې
هم پرې ټولې دملالې
خاطیرې او ټپې ناستې
دا په مینځ ېې ژرنده بیله
لکه مخامخ ولاړې
دوه لښکرې وي یو بل ته
***    ***
دغه ښکلې ښکلې سترګې
پکې لویه زمانه ده
پرې نقشه د زندګۍ ده
پکې زر افسانې پټې
په لیدو ېې سړی رسي
د قدرت تر لویه خدایه
***    ***
دا په سترګو کې ډنډونه
ویریدلې شان مسکا ېې
دا کاته ېې داسې کړي
لکه ورور د چا چې راوړي
د دوښمن سر په نیزه کې
لوی بری تر کلي راوړي
د جنګونو له ډګره
ورته جونه په ټپو شي
پرې را شیندي سرې ګل پاڼې
د بامونو له سرونو
خو ناڅاپه له آس پریوځي
د چینې سره په خوا کې
په ټټر ېې وي خوړلې
د تیرو غشو ګیډۍ وي
***    ***
د نریو وروزو مینځ کې
شینکې خال ېې داسې ښکاري
د جنت حوره که نه ده
خو د غرونو پښتنه ده
ټول غرور ده او حیا ده
له ملالې کمه نه ده
عجیبه شان افسانې ېې
په ګل پاڼه څیره ناستې
پته نیشته ده ملګرو
ددې مړه مساپر جیب کې
دا تصویر چې به د چا وي؟؟

ځاځي آریوب ۲۲ - ۳ - ۲۰۰۰

د ښاغلي ارمان " لېوني" شعرونه

د شعرونو لومړۍ پاڼه


 

ددې پاڼې د محتوياتو د مکررچاپ حقوق په بشپړه توګه خوندي دي، دهر قسم نشر او کاپي کولو څخه دې ډډه وشي !
 که د "هيواد" په هکله  کومه پوښتنه يا نيوکه لرئ د
"هېواد" د مسئولې ډلې سره په تماس کې شئ.