ښکلامروت

په هغو سترګو کې خمار دالفت پاتي نه شو
ځواني ورځه اوس دلغزش ضرورت پاتي نه شو

دنظر ژبې ئې کیسې کړې یو پر بله پسې
ګلابي شونډو ته ئې ځکه فرصت پاتي نه شو

داسې عادت کړمه قفس دخلوتونو سره
چې په وزرو کې مې شوق د الوت پاتي نه شو
 
چې ئې هوا پلو اوچت کړي مخ په څڼوکړي پټ
په دې مالت کې د ښکلا مروت پاتي نه شو

چې مو تر منځ شول دبیلتون دکنګلونو غرونه
دا مو په مینه کې هغه حرارت پاتي نه شو

مونږ چې لمنې کړې داغونوته خورې حسنه
دمحبت په لاله زار کې تهمت پاتي نه شو