غزل

داچې درګرده ، زه په زړه باندې لاسونه ږدمه
د زړه له درده ، زه په زړه باندې لاسونه ږدمه

د عشق هندارې خړوي ، د هوس باد را الوتی
له دغې ګرده ، زه په زړه باندې لاسونه ږدمه

هغه غله سترګې بيا راغلې ده ، لږ پام په کار دی
هغه بهر ده ، زه په زړه باندې لاسونه ږدمه

قاتلې ! کوم ساده د لمر په وړانګوپرخه سپاري ؟
ته يې نامرده ، زه په زړه باندې لاسونه ږدمه

داسې بې واره چې راګورې ، نو څه چل خو شته دی
ځکه په زغرده ، زه په زړه باندې لاسونه ږدمه