د
اسماعيل خان د ليرې کيدو ....... |
نن سبا په ميډيا کې د اسماعيل خان د ليرې کيدو
خبره ډيره ګرمه روانه ده. او په همدې ترتيب د ولايت سره به يې هم په
آينده کې د
" پخواني" لفظ ليکو - لکه او س چې وايو د جنوب غرب حوزې پخوانئ امير -
له دې وروسته به د پخواني والي صفت هم ورته راجع کوؤ او سترګې په لار
يو چې ډير ژر د کانونو او صنايعو د پخواني وزير لقب هم وګټي - اوس راځم
د مطلب خبرې ته:
که ښه ځير شو او دغه مسئله لږ له نژدې څخه په دقت وګورو نو پوهـ
به شو چې دا مړی پدې ژړا نه ارزي. دا د حکومت په اداري چوکاټ کې د يوې
وړې تبديلئ خبره ده. که چيرته اسماعيل خان د افغانستان د حکومت والي وي
نو مقرري او تبديلي يې د حکومت صوابديد او قانوني حق دی. او که چيرته
دافغانستان د هر ولايت والي خپل ځانته د هغې ولايت د اجاره دار فکر
وکړي نو د افغانستان ملي مصالح په خطر کې لويږي او د طوائيف الملوکۍ
وبا چې اوس يې ټغر په
ټوليدو دی بيا قوت مومي - د ګاونډيانو لاسوهنې زياتيږي،
ملي شتمنۍ لوټيږي - اشخاص تبارز کوي او د يوه قوي افغانستان د مقتدر
مرکزي حکومت رامينځ ته کيدل ناشوني کوي.
مونږ د افغانستان د حکومت دغه جرئتمندانه اقدام ته په درنه سترګه ګورو،
تشجيع او تحسينوؤ يې او هيله لرو چې د جنګسالارانو او يا هم د خپلو
جګپوړو مامورينو د تبديلئ، ګوښه کولو او په کور کښېنولو مسلم حق د ملت
د پراخې ګټې په نظرکې نيولو سره جاري وساتي. ملي منافعو ته په ټولو
شخصي مصلحتونو ترجيح ورکړي او په داسې نيکو اقدامونو کې د چا د سترګو
رډولو پروا ونه کړي.
ومن الله توفيق
د "هـــيواد" اداره
ددې پاڼې د
محتوياتو د مکرر چاپ حقوق په بشپړه توګه خوندي دي د هرقسم نشر
او کاپي کولو څخه دې ډډه وشي! |
|