Hewad Afghanistan
کـــور

د لوړې د مراسمو په درشل کې د عبدالله عبدالله د بیا مرورېدو اوازې

نيټه : 2014-09-29

تاند- اوازې دي چې عبدالله عبدالله د ولسمشرۍ د انتخاباتو د رایو د فیصدي پر اعلانېدو پارېدلی او ممکن نن /دوشنبه/ د نوي ولسمشر اشرف غني احمدزي د لوړې په مراسمو کې ګډون ونه کړي.

د عبدالله عبدالله ټیم وړمه ورځ وروسته له دې چې د انتخاباتو د خپلواک کمیسیون ویندوی احمد یوسف نورستاني د انتخاباتو د رایو فیصدي اعلان کړه، په یوه اعلامیه کې دا کار وغانده او ویې ویل چې دا مسله د دواړو انتخاباتي ټیمونو د موافقې خلاف و. خو په خپله عبدالله عبدالله په دې اړه تراوسه په ښکاره څه نه دي ویلي.

د انتخاباتو د خپلواک کمیسیون رييس یوسف نورستاني د تېرې اوونۍ د یکشنبې په ورځ /سپټمبر ۲۱/ د اشرف غني د بریالیتوب د اعلانولو په مهال ویلي و چې د رایو فیصدي به وروسته اعلان شي.

د ناټو ځینو چارواکو ویلي و چې ممکن د رایو فیصدي د اجرايي چارو د رييس له معرفي کېدو وروسته اعلان شي.

د کمیسیون له اعلان سره سم اشرف غني احمدزي په سلو کې ۵۵ اعشاریه ۲۷ رایې ګتلي دي.

خپرې شوې اوازېو چې نیویارک ټایمز ورځپاڼې هم تایید کړي دي، د عبدالله عبدالله په قول وايي چې نوموړي خبرداری ورکړی دی چې که د اشرف غني احمدزي د لوړې په مراسمو کې د ده د لوړې مراسمو ته ورته اهمیت ورنه کړای شي یا د وینا اجازه ورنه کړای شي، نو دا مراسم به تحریم کړي.

که څه هم ویل شوي چې نن به حامد کرزی، اشرف غني احمدزی او عبدالله عبدالله ویناوې وکړي خو د عبدالله عبدالله د ټیم له قوله ویل شوي چې دوی په دې خوابدي دي چې په نننیو مراسمو کې عبدالله ته د وینا فرصت په پام کې نه دی نیول شوی.

عبدالله عبدالله ته نژدې سرچینې وايي چې که نوموړي ته د وینا موقع ورنه کړای شي، نه به د نوي ولسمشر اشرف غني احمدزي د لوړې په مراسمو کې ګډون وکړي او نه به په خپله د اجرايي چارو د رييس په توګه د لوړې مراسمو ته حاضر شي.

داسي راپورونه هم شته چې د اشرف غني احمدزي او عبدالله عبدالله د انتخاباتي ټیمونو ترمنځ په ارګ کې د زیات ځای پر سر ناندرۍ روانې دي.

دا راپورونه مستقلو سرچینو نه دي تایید کړي او تاند یې هم نه تاییدوي او نه ردوي.

داسي راپورونه هم شته چې د عبدالله وسله والو ملاتړ کوونکو د ولسمشر د لومړي مرستیال دفتر نیولی او ټینګار کوي چې د ولسمشر د لومړي مرستیال دفتر دې عبدالله عبدالله ته ورکړای شي.

Print


© Copyright 2008. All rights reserved. Contact: Webmaster
Interested in any special article? Please contact wembaster for permission!