په افغانستان کې د امريکايي ځواکونو لپاره د تر ټولو خونړۍ مياشتت په پاى کې ولسمشر بارک اوباما وايي که امريکا خوندي وبولي همدا نن نن به له افغان خاورې سرتېري وباسي.
ښاغلي اوباما په يوه تلويزيوني مرکه کې د افغانستان د جگړې لپاره خپل اهداف هم په گوته کړل.
په همدې ترڅ کې د متحدو ايالاتو د دفاع وزير له پاکستانه د دفاع ترڅنگ وويل چې راتلونکى کال به ډير لږ امريکايي سرتېري له افغانستانه ووځي.
سربېره پردې چې ولسمشر بارک اوباما په خپل هېواد کې د افغانستان د جګړې له سخت فشار سره لاس او ګرېوان دی، د يکشنبې پر ورځ يې په يوه ټلوېزوني مرکه کې افغانستان د جګړې موخې محدودې وبللې او ګټل يې ستونزمن ونه بلل.
امريکايي ولسمشر وويل چې د افغانستان د جګړې په باب دا هيله هيچا نه ده کړې چې په دغه هېواد کې دې د لوېديځ په ډول بشپړه ډموکراسي پلې شي.
دا کار د اوباما په اند ډېر ستونزمن کار دی، خو په سيمه کې د ترهگرو د فعاليت ختمول، د روزنيزو کمپونو تړل او پر امريکا له هغه ځايه د بريد مخنيوى اسانه دى.
اوباما وويل چې موږ په افغانستان کې ټيکاو راوستلای شو او پاکستان د ده په خبره ''له موږ سره پر امريکا د بريد د خطر په کمولو کې ډېره مرسته کوي. ''
ده وويل که په دې پوه شو چې د امريکا د امنيت ساتنې ښه لار دا ده چې د افغانستان جګړه پای ته ورسوو، نو د پوځونو را ايستلو اعلان به دا نن نن وکړي.
د ده په وینا، د هر وژل شوي امريکايي عسکر کورنۍ ته دی ځواب ليکي.
پر دې سربېره چې د افغانستان جګړه په امريکايانو کې ورځ په ورځ ملاتړ له لاسه ورکوي، د دغه هيواد دفاع وزير رابرټ ګېټس پر دې خبره ټينګ دی چې د ولسمشر بارک اوباما پر اعلان سربېره چې د راتلونکي ميلادي کال تر جولای پورې يو څه عسکر له افغانستان څخه راباسي ډېر شمېر پوځونه به بيا هم د ده په خبره په افغانستان کې پاتې شي.
د امريکا د دفاع وزير د پاکستان دفاع هم وکړه ويې ويل چې د اسنادو تر افشاګرۍ وروسته چې ويل يې د اسلام اباد څارګره اداره د افغان طالبانو لارښوونه کوي د پاکستان حکومت اوس پر جنګاليو سمدلاسه بريدونه کوي.
رابرټ ګېټس چې په اي. بي. سي ټلوېزون کې خبري کولې وويل پاکستان په خپله تګلار کې ډېر بدلون راوستي او د ده په قول په مرسته او ملګرتيا کې يې ډېر زياتوالی راغلی دی.
د امریکا د نبراسکا پوهنتون څېړونکی شېرجان احمدزی وايي که څه هم ولسمشر بارک اوباما يو دیموکرات دی، او دموکراتان معمولاً د جګړې پلویان هم نه دي، بل دا چې پر هغه د ولس فشار دی چې د افغانستان روانې جګړې ته ژر تر ژره پای ورکړي.
ولسمشر اوباما د ولسمشرۍ څوکۍ ته تر رسېدا وروسته سملاسي ژمنه کړې وه، چې دا جګړه به پای ته رسوي.
ښاغلی احمدزی وايي لکه څرنګه چې امریکا په افغانستان کې د ملت جوړونې د پروژې پلان جوړ کړی و، هماغسې جوړه نه شوه.
