یونظر، یو وړاندیز

دمیرویس نیکه نوم ،دده فوق العاده شخصیت، ملي او وطنپال کرکتر...  تر لمر روښانه او منل شوی دی.
دده د ښېګڼو په سر کې دده هغه هلې ځلې، هاند او مبارزه ده چې د پارس د اشغالګردولت او دهغه د ګوډاګي (ګورګین) له اسارت اوظلم نه یې د افغانستان د خلاصون لپاره وکړه؛ تر څو یې کورني د هوتکیانو امپراطورۍ رامنځته کړه او اشغالګر یې تر خپل کوره بېرته پر شا کړل «خدای دی ورته اجر ورکړی».
د علامه پوهاند عبدالحی حبیبي د ( تاریخ مختصر افغانستان ) په ۲۴۹مخ کې راغلي چې :« بر تربتش چنین نوشته اند:

«بر سر تر بت ما چون گذری همت خواه            که زیارتگه رندان جهان خواهد بود»
دیوان حافظ شیرازی از نسخه محمد قزوینی و دکتر قاسم غنی ،صفحه ۱۲۷ انتشارات میلاد

په دې هکله غواړم ووایم چې: دا به دهغه ستر او پاک روح ته لوی سپکاوی وي چې دپردیو(دپارس د متجاوز ددولت) پر ضد له ټولې سر سختې مجادلې سره یې بیا هم په قبر د پارس د یوه شاعر(خواجه شمس الدین محمد حافظ شیرازی) شعر ولیکل شي.
بله دا چې میرویس نیکه یو دروند ، مدبر او د قوم او ولس مشر پښتون شخصیت وه چې د (رند) لقب ورته له سره استعمالېدی نه شي.

نو زما غوښتنه داده چې د صلاحیت لرونکي درانه پوهان دې ددې کتیبې د تغیر له پاره په خپله د میرویس نیکه له شعرونو څخه او یا د وطن د کوم بل شاعر شعر چې د هغه له شخصیت او حالت سره سمون ولري يو شعر غوره کړي او له مسئولو مقاماتو نه دې د نوې کتیبې د جوړولو او نصب غوښتنه وشي.
 

په درناوي

اسدالله زمری